श्रीनाथ नागरी सहकारी पतसंस्थेचे संस्थापक चेअरमन पोपटराव शेवाळे यांची आत्महत्या

 अहमदनगर (प्रतिनिधी) : सोहेल मनियार 

आर्थिक दिवाळखोरीमुळे बंद पडलेल्या श्रीनाथ नागरी सहकारी पतसंस्थेचे संस्थापक चेअरमन पोपटराव एकनाथ शेवाळे वय 63 वर्ष राहणार वडगाव गुप्ता तालुका नगर यांनी राहत्या घरात विषारी औषध प्राशन करून आत्महत्या केली आहे.

शेवाळे यांनी 31 मार्च रोजी सायंकाळी राहत्या घरात विषारी औषध प्राशन केले. त्यांना त्यांच्या कुटुंबीयांनी तातडीने नगर मधील एका खाजगी रुग्णालयात उपचारासाठी दाखल केले तेथे उपचार सुरू असताना बुधवारी रात्री 8.49 च्या सुमारास त्यांचा मृत्यू झाला. मयत शेवाळे यांच्या मृतदेहाचे गुरुवारी दिनांक 4 रोजी सकाळी जिल्हा शासकीय रुग्णालयात शवविच्छेदन करण्यात आले. याप्रकरणी एमआयडीसी पोलीस ठाण्यात आकस्मात मृत्यूची नोंद करण्यात आली आहे.शेवाळे यांच्या पश्चात पत्नी , एक मुलगा, तीन मुली असा परिवार आहे.

मयत शेवाळे यांनी वडगाव गुप्ता गावात श्रीनाथ नागरी सहकारी पतसंस्था सुरू केली होती. अल्प कालावधीतच या पतसंस्थेचा विस्तार होत नगर तालुक्यात अनेक गावांमध्ये शाखा सुरू झाल्या मात्र काही कालावधीनंतर ही संस्था आर्थिक डबघाईला गेली आणि एक एक करत सर्व शाखा बंद पडल्या. पतसंस्थेत अनेक ठेवीदारांचे ठेवी अडकल्या होत्या त्यामुळे त्यांनी पोलिसांकडे केलेल्या तक्रारीनंतर शेवाळे यांच्यासह अन्य पदाधिकाऱ्यावर गुन्हा दाखल करण्यात आला.

शेवाळे यांना पोलिसांनी अटकही केली ते अनेक दिवस कारागृहात होते गेले काही दिवस ते जामिनावर सुटलेले होते घरी असताना 31 मार्च रोजी सायंकाळी विषारी औषध प्राशन केले रुग्णालयात उपचार सुरू असताना त्यांचा मृत्यू झाला.