झाल इलेक्शन... जपा रिलेशन...

 

 लोकमन महाराष्ट्र न्यूज (प्रतिनिधी) : सोहेल मनियार

मोठ्या उत्साहात ग्रामपंचायत निवडणूका गावोगावी संपन्न झाल्या, काहींचा दणदणीत विजय होईल,काहींचा दारुण पराभव होईल तर कोणी काठावर निवडून येईल तर कोणी थोडक्यात अपयशी ठरेल. काहींनी बंडखोरी करून अपक्ष निवडणूक लढवली यात काही यशस्वी होतील तर काही अपयशी.गावकीच राजकारण फार बेकार असते.

सत्तेचा सारीपाट हा गेली एक महिन्यापासून आपण आप- आपल्या गावात अनुभवला, निवडून येण्यासाठी वेगवेगळ्या संकल्पना राबवणे, आलेल्या सणाचा, वाढदिवसाचाही उपयोग करून घेणे, प्रचार प्रभावी कसा होईल यासाठी वाटेल ते करणे यामुळे नकळत आपलेच आपल्या विरोधात गेले, कोण हा वार्डात तर कोणी विरोधी वार्डात. घरातली, रक्ताची नाती प्रतिस्पर्धी बनली, एकमेकांचे उणेंदुणे काढून आपण याच्यापेक्षा कसा प्रभावी उमेदवार आहे.मीच कसा चांगला किंवा माझी पार्टी, पॅनल कसा चांगला हे पटवून देण्यात आले.

 उमेदवारांनी दिवसाची रात्र केली, ढाबे, पार्ट्या रंगल्या, विकासकामांचे जाहिरनामे, विकासाची वचनपूर्ती, वेगवेगळ्या चालीवरती बसवलेली गाणी, सोशल मीडिया ग्रुप, एलईडी टेक्नॉलॉजीचा पुरेपूर फायदा घेत प्रत्येकाने यशस्वी होण्यासाठी पराकाष्ठा केली आहे.

    गुलाल कुणाचाही असो सर्व माणसं आपल्याच गावातील आहेत, आपलीच आहेत, कोणताही विजय किंवा पराजय हा अंतिम नसतो, शांत रहा संयमी रहा, मागील 15 दिवसात ज्या लोकांना हात जोडत होता त्यांना त्रास होईल असे न वागता, गावच्या सर्वांगीण विकासासाठी तरुण पिढीच्या भवितव्यासाठी राग, विरोध, द्वेष विसरून एक होणे गरजेचे आहे, आपल्या कर्तृत्वाने प्रभुत्व निर्माण होईल नि नेतृत्वाची धुरा नक्कीच तुमच्या हातात येईल म्हणूनच झालं इलेक्शन आता जपा रिलेशन हे ध्यानात ठेवून सर्वांगीण विकासासाठी भविष्यात एकत्र येण्याची गरज आहे. आणि ती प्रत्येक गावात जपली पाहिजे. सर्वांनी एकच कानमंत्र ध्यानात घ्यायला पाहिजे. तो म्हणजे

झालं इलेक्शन.........जपा रिलेशन.

निंबळक प्राथमिक शाळेत आपत्ती व्यवस्थापन मॉकड्रिलचे प्रात्यक्षिक संपन्न 

अहमदनगर : जिल्हा परिषद अंतर्गत नगर तालुक्यातील निंबळक प्राथमिक शाळेत शालेय शिक्षण - क्रीडा विभाग, मुंबई व राज्य शैक्षणिक संशोधन व प्रशिक्षण परिषद ,पुणे यांच्या निर्देशानुसार शाळा सुरक्षा कार्यक्रमांतर्गत ( स्कूल सेफ्टी प्रोग्राम )  मॉकड्रिलचे प्रात्यक्षिक  प्रशिक्षणार्थी नोडल शिक्षक राजेंद्र निमसे यांच्या मार्गदर्शनाखाली यशस्वीरित्या संपन्न झाले .

महाराष्ट्र राज्यातील ३४ जिल्ह्यांमधील प्रत्येकी १ अशा ३४ आदर्श शाळांमध्ये ( मॉडेल स्कूल ) आपत्ती व्यवस्थापन कार्यक्रम मॉकड्रिल चे आयोजन करण्यात आले होते . या मॉकड्रिलसाठी अहमदनगर जिल्ह्यातून एकमेव निंबळक या प्राथमिक शाळेची निवड करण्यात आली होती . सदर प्रात्यक्षिक मॉकड्रिलचा  एकमेव उद्देश म्हणजे अचानक येणाऱ्या नैसर्गिक किंवा मानवनिर्मित आपत्तीपासून शालेय विद्यार्थी हा स्वतःचा व इतरांचाही बचाव कसा करू शकेल याबाबतचे वस्तूस्थितीदर्शक प्रात्यक्षिक करून घेणे हा आहे .

या मॉकड्रिलसाठी भूकंप हा विषय घेऊन प्रात्यक्षिकाचे नियोजन करण्यात आले होते . प्रथम विद्यार्थ्यांचे वेगवेगळे गट करून मॉकड्रिल मध्ये सामील झालेल्या सर्व विद्यार्थ्यांना धोक्याचा सायरन देऊन प्रत्यक्ष प्रात्यक्षिकाची सुरुवात झाली . दोन्ही खोल्यांमधील विद्यार्थ्यांना शिक्षकांच्या मदतीने डोक्यावर दप्तर घेऊन मैदानावर सुरक्षित ठिकाणी आणण्यात आले . मात्र वर्गशिक्षकांनी विद्यार्थ्यांची संख्या मोजल्यानंतर काही विद्यार्थी हे कमी आढळले . संबंधित शिक्षकांनी विद्यार्थ्यांच्या मदत बचाव गटाद्वारा सर्व जखमी विद्यार्थ्यांना योग्य शास्त्रीय पद्धतीने मैदानात आणून त्वरित  उपस्थित झालेले आरोग्य विभागाचे डॉक्टर व शिक्षकांच्या मदतीने प्रथमोपचार पेटीच्या सहाय्याने प्रथमोपचार करण्यात आले . तसेच काही गंभीर जखमी झालेल्या विद्यार्थ्यांना आरोग्य विभागाच्या डॉक्टरांनी तपासणीनंतर सरकारी रुग्णवाहिका उपलब्ध झाल्यामुळे त्यांना जिल्हा शासकीय रुग्णालय येथे  पाठवण्यात आले . अग्निशमन दलाने विद्यार्थ्यांची सुखरूप सुटका करण्यासाठीची विविध थरारक प्रात्यक्षिके दाखविली . हे सर्व आपत्ती व्यवस्थापन कार्यक्रमातील सुसज्ज यंत्रणा व उत्कृष्ट सादरीकरण केलेला कार्यक्रम पाहून विद्यार्थ्यांसह उपस्थित ग्रामस्थही आश्चर्यचकित झाले .

या मॉकड्रिलसाठी होमगार्डचे पलटण अधिकारी संजय शिवदे , होमगार्ड तालुका समादेशक माधव हरवणे ,आपत्कालीन वैद्यकीय अधिकारी डॉ सुभाष बागले ,डॉ प्रशांत नांगरे ,डॉ दीपिका गाडे ,भाऊसाहेब बनगे सुरेश दळवी ,अग्निशमन कर्मचारी बाळासाहेब घाटविसावे, जिल्हा परिषद निरीक्षक जबीन शेख ,सुचिता टकले यांचेसह पंचायत समिती नगरचे उपसभापती डॉ. दिलीप पवार , सरपंच प्रियांका लामखडे , व्यवस्थापन समिती अध्यक्ष गोरक्षनाथ कोतकर ,ग्रामपंचायत सदस्य दत्तात्रय कोतकर ,दत्तू दिवटे , बी डी कोतकर ,प्रभारी मुख्याध्यापक सुखदेव पालवे  नोडल  प्रशिक्षणार्थी शिक्षक राजेंद्र निमसे , शरद जाधव ,दत्तात्रय जाधव , भागचंद सातपुते ,विशाल कुलट ,कल्पना शिंदे , अर्चना जाचक ,अलका कांडेकर , सुनिता रणदिवे , सुजाता किंबहुने , प्रज्ञा हापसे ,शैला सरोदे आदी उपस्थित होते . हा शाळा सुरक्षा कार्यक्रमांतर्गत मॉकड्रिल चे प्रात्यक्षिक यशस्वीपणे सादरीकरण केल्याबद्दल जि प चे प्राथमिक शिक्षणाधिकारी भास्कर पाटील , नगरचे गटशिक्षणाधिकारी बाबुराव जाधव , हिंगणगाव केंद्रप्रमुख बाळासाहेब दळवी यांनी निंबळक शाळेचे अभिनंदन केले आहे .

या कार्यक्रमाचे प्रास्ताविक प्रशिक्षणार्थी नोडल शिक्षक राजेंद्र निमसे यांनी केले . उत्कृष्ट असे सूत्रसंचालन दत्तात्रय जाधव तर आभार भागचंद सातपुते यांनी मानले .

 

सामाजिक कार्यकर्ते प्रकाश पोटे यांच्या गाडीवर अज्ञात इसमांनी केली दगडफेक

 

लोकमन महाराष्ट्र न्यूज (प्रतिनिधी) :सोहेल मनियार

काल रात्री अज्ञात समाज कंटकांनी राष्ट्रवादी काँग्रेसचे जिल्हा सरचिटणीस तथा जनआधार सामाजिक संघटनेचे प्रकाश पोटे यांच्या गाडीवर,भ्याड हल्ला करून केला आहे.

 गाडीवर झालेले दगडफेकीनंतर  प्रकाश पोटे म्हणाले मी करत असलेल्या निर्भिड कामापासून रोखण्याच्या व माझ्या मनात भीती घालविण्याचा केविलवाणा प्रयत्न केला...अशा बुध्दीहिन,लोकांचा जाहीर निषेध.... अशी प्रतिक्रिया प्रकाश पोटे यांनी दिली. 

पोलीस यंत्रणेने लवकरात लवकर सदर घटनेचा तपास करावा अन्यथा अहमदनगर जिल्हा पोलीस अधीक्षक कार्यालयासमोर आंदोलन करण्याचा इशारा सामाजिक कार्यकर्ते प्रकाश पोटे यांनी दिला.

दिवसभरातील महत्त्वाच्या घडामोडी

 

लोकमन महाराष्ट्र न्यूज (प्रतिनिधी) : सोहेल मनियार

➣सगळे प्रकल्प पळवले, मग एकतर्फी निकाल लागणारच, गुजरात निकालावर शरद पवार यांची प्रतिक्रिया 

➣अमित शाहांनी महाविकास आघाडीच्या खासदारांना दिलेली भेटीची वेळ अचानक रद्द,  

➣अधिकाऱ्याची पत्नी टँकरसमोर हंडा घेऊन कधी उभी दिसते का?; मुंबई उच्च न्यायालयाच्या औरंगाबाद खंडपीठाचा महापालिकेला खरमरीत सवाल  

➣महाराष्ट्रद्रोह्यांविरोधात 17 डिसेंबरला मविआचा मुंबईत विराट मोर्चा

➣संपत्तीच्या लालसेपोटी मुंबईत मुलाकडून आईची निर्घृण हत्या, मृतदेह पेटीत भरून माथेरानच्या नदीत फेकला  

➣कोकणात पावसाचा अंदाज, 'मंदोस' चक्रीवादळाचा कोकण किनारपट्टीवर परिणाम   

➣गुजरात विधानसभा निवडणुकीत भाजपचं अभूतपूर्व यश, सलग सातव्यांदा विधानसभा निवडणुकीत बाजी, तब्बल 157 जागा जिंकत विधानसभेवर कब्जा

➣ऐतिहासिक विजयानंतर गुजरातमध्ये 'मेगा शो'ची तयारी, पंतप्रधान नरेंद्र मोदींच्या उपस्थितीत भूपेंद्र पटेल 12 डिसेंबरला शपथ घेणार 

➣नाशिकमध्ये एसटीचा विचित्र अपघात! ब्रेक फेल झाला, बाईकस्वारांना चिरडले अन् पेट घेतला! अपघातात तिघांचा मृत्यूू

रस्त्याचे काम सुरू न झाल्यास अधिकाऱ्यांना काळे फासणार जन आधार संघटनेचा इशारा : उक्कडगाव- मांडवादरम्यान डांबरीकरण रखडले

 

अहमदनगर (प्रतिनिधी) : सोहेल मनियार

नगर तालुक्यातील उक्कडगाव- मांडवा या रस्त्याचे काम गेल्या वर्षभरापासून अर्धवट अवस्थेत आहे. येत्या १५ दिवसांत हे काम सुरू न झाल्यास बांधकाम विभागाच्या अधिकाऱ्यांना काळे फासू, असा इशारा जन आधार सामाजिक संघटनेचे अध्यक्ष प्रकाश पोटे यांनी दिला आहे. सार्वजनिक बांधकाम विभागाचे सहायक अधीक्षक अभियंता ग.भि. पाटील यांना शुक्रवारी पोटे यांनी निवेदन दिले.

उक्कडगाव- मांडवा या अडीच कोटी रुपये खर्चाचे काम गेल्या वर्षभरापासून सुरू आहे; परंतु, वर्षभरात पूर्ण खडीकरणही झालेले नाही. काही ठिकाणी खडीचे ढिगारे तसेच आहेत. झालेले खडीकरण उखडले असून डांबरीकरण अद्याप बाकी आहे. हे काम पावसाळ्यात बंद होते.

आता पाऊस उघडून दीड महिना झाला तरी रस्त्याचे काम ठेकेदाराने सुरू केलेले नाही. संबंधित ठेकेदाराची प्रशासनाकडे अनेकदा तक्रार केली तरी प्रशासन दखल घेत नाही. अशा मुजोर ठेकेदारामुळे व प्रशासनाच्या ढिसाळ कारभारामुळे कोट्यवधी रुपये खर्चूनदेखील सर्वसामान्य प्रवाशांच्या दळणवळणात अडचणी येत आहेत. 

त्यामुळे हे काम येत्या १५ दिवसांत सुरू झाले नाही तर बांधकाम विभागाच्या संबंधित अधिकाऱ्यांना काळे फासण्यात येईल, असे पोटे यांनी निवेदनात म्हटले आहे. यावेळी संघटनेचे विजय मिसाळ, अमित गांधी, दीपक गुगळे, शाहनवाज शेख, गौतमी भिंगारदिवे आदी उपस्थित होते.