सेवा सोसायटी निवडणुकीत महाविकास आघाडीच्या पॅनलचा दणदणीत विजय

 

नगर तालुक्यातील चिचोंडी पाटील सेवा संस्थेच्या निवडणुकीत विजयी होऊन जल्लोष करताना महाविकास आघाडीच्या शेतकरी विकास पॅनलचे उमेदवार...(छाया : सोहेल मनियार)

चिचोंडी पाटील : (प्रतिनिधी)

नगर तालुक्यातील सर्वात मोठ्या चिचोंडी पाटील सेवा सोसायटीच्या निवडणुकीकडे सगळ्या तालुक्याचे लक्ष लागले होते. निवडणूक होऊन लगेच निकाल लागला.यात माजी सभापती इंजी.प्रवीण कोकाटे, माजी उपसरपंच शरद पवार यांच्या नेतृत्वाखालील महाविकास आघाडीच्या पॅनलने मातब्बर विरोधकांचे पानिपत केले.

यात माजी आमदार शिवाजीराव कर्डिले व माजी आमदार राहुल जगताप गटाचा दारुण पराभव झाला.

नगर तालुक्यातील चिचोंडी पाटील गाव तालुक्यातील सर्वात मोठे गाव. या गावातील सेवा संस्थेचे निकालाकडे सगळ्यांच्याच नजरा लागल्या होत्या .

यात शेतकरी विकास पॅनेलचे नेतृत्व युवा नेते प्रवीण कोकाटे,मच्छिंद्र खडके, शिक्षक नेते आबासाहेब कोकाटे ,माजी उपसरपंच शरद पवार ,शिवसेनेचे डॉ. ययाती फिस्के, माजी सरपंच शंकर पवार यांनी महाविकास आघाडीचा धर्म पाळत एकत्र येऊन आव्हान उभे केले होते.

विरोधात किसान क्रांति पॅनेलचे नेतृत्व बाजार समितीचे माजी संचालक बाजीराव हजारे, सरपंच तथा तालुक्याचे भाजपचे नेते मनोज कोकाटे,सुनील कोकाटे, प्रभाकर कोकाटे,अमोल कोकाटे,भाजप नेते बबन शेळके यांनी आघाडी तयार केली. 

यामध्ये तालुक्यातील भाजप माजी आमदार शिवाजीराव कर्डिले,राहुल जगताप यांना शिवसेना व समविचारी आघाडीने आव्हान उभे केले होते. दोन्ही बाजूंनी जोरदार प्रचार यंत्रणा राबवण्यात आली.तालुक्यात ही निवडणूक प्रतिष्ठेची बनली होती. मागील पंचवार्षिक निवडणूक बिनविरोध केली होती.मागील चेअरमन कर्डिले समर्थक बाजीराव हजारे गटाचा होता.

शेतकरी विकास पॅनलचे बारा उमेदवार मोठ्या मताधिक्काने विजयी झाले. एका उमेदवाराचा निसटता पराभव झाला.

विजयी उमेदवार-

सर्वसाधारण जागा - महादेव खडके,डॉ.मारुती ससे, दिलीप पवार,संदीप कोकाटे,सुरेश ठोंबरे, काशिनाथ वाडेकर,बबन कोकाटे,

महिला - शोभा विठ्ठल कोकाटे, अल्का अर्जुन वाडेकर,

इतर मागास वर्ग - पंडित मुरलीधर कोकाटे

अनु. जाती - बेबी चंद्रकांत सदाफुले

विशेष मागास प्रवर्ग - अंबादास धोंडीबा फिसके 

महाविकास आघाडीच्या शेतकरी विकास पॅनलचे १२ उमेदवार  निवडून आल्याबद्दल शिवसेना जिल्हाप्रमुख शशिकांत गाडे सर यांनी विजयी उमेदवारांचा सत्कार केला व पुढील कार्यास शुभेच्छा दिल्या.

चौकट -

सर्व मतदारांनी महाविकास आघाडी प्रणीत शेतकरी विकास पॅनलच्या उमेदवारांवर विश्वास ठेवून सर्वच उमेदवारांना भरघोस मतांनी निवडून दिल्याबद्दल सर्व मतदारांचे आम्ही खूप ऋणी आहोत.सेवा सहकारी संस्थेच्या माध्यमातून शेतकऱ्यांच्या हिताचे काम करण्यास आम्ही सदैव तत्पर आहोत.

--

मा.सभापती प्रवीण कोकाटे

एकलव्य आदिवासी बहुजन पार्टीच्या शिराढोण शाखेचा शुभारंभ

 

एकलव्य आदिवासी बहुजन पार्टीच्या शिराढोण शाखेचा शुभारंभ करताना पदाधिकारी, कार्यकर्ते...(छाया : सोहेल मनियार)

चिचोंडी पाटील (प्रतिनिधी) : सोहेल मनियार

तालुक्यातील शिराढोण येथे एकलव्य आदिवासी बहुजन पार्टी च्या नवीन शाखेचा शुभारंभ संस्थापक अध्यक्ष रघुनाथ शिवराम जाधव यांच्या मार्गदर्शनाखाली करण्यात आला.

त्याच्या ध्येयधोरण नियम व अटींचे अधीन राहून पार्टीचे ध्येयपूर्तीसाठी सदैव कार्यरत राहून समाजपरिवर्तनाच्या या राष्ट्रीय चळवळीमध्ये आपले संपूर्ण योगदान द्या असे मार्गदर्शन कार्यकर्त्यांना केले.

शुभारंभप्रसंगी कमिटी मेंबर संतोष निकम,अहमदनगर जिल्हा अध्यक्ष दीपक साहेबराव चांदणे , दक्षिण जिल्हाध्यक्ष बाळासाहेब नारायण जाधव, जिल्हा संपर्कप्रमुख संजय विष्णू साठे, महाराष्ट्र राज्य अध्यक्ष बाळासाहेब सोळुके, 

राहुरी तालुका अध्यक्ष आप्पासाहेब गांगुर्डे, कार्याध्यक्ष दगडू हिरामण बर्डे, शिराढोण उपसरपंच तथा राष्ट्रवादी नगर श्रीगोंदा विधानसभा मतदार संघ अध्यक्ष दादासाहेब दरेकर, 

शिराढोन सरपंच मच्छिंद्र थोरात, नगर तालुका अध्यक्ष अनिल मोहन बर्डे, शाखाप्रमुख अमोल बर्डे, उपशाखाप्रमुख महेश बरडे, खजिनदार विजय बर्डे,सचिव राजेंद्र माळी आदी पदाधिकारी आणि कार्यकर्ते मोठया संख्येने उपस्थित होते.

चक्रीवादळाने शेडनेट, झाडे,फळबागा जमीनदोस्त ; शेतकऱ्यांचे संसार उघड्यावर ; भरपाई ची मागणी अन्यथा आत्महत्येचा इशारा

 

चक्रीवादळाच्या तडाख्यात जमिनदोस्त झालेले शेडनेटमधील लाखो रुपयांचेमिरची चे पीक (छाया : सोहेल मनियार)

चिचोंडी पाटील : (प्रतिनिधी)

आष्टी तालुक्यातील नांदूर विठ्ठलाचे येथे चक्री वादळाने थैमान घातले .यामध्ये शेतकऱ्यांची शेडनेट, पॉलिहाऊस, आंब्याची झाडे, डाळिंबाची बाग जमीनदोस्त झाली आहे.

लाखो रुपयांची पिकाचे नुकसान झाले असून शासनाने पंचनामे करून भरपाई द्यावी अशी मागणी शेतकऱ्यांनी केली आहे. अन्यथा आत्महत्या केल्याशिवाय पर्याय नाही असा इशारा शेतकर्यांनी दिला.

नांदूर विठ्ठलाचे येथील शेतकरी उद्धव राजाराम विधाते यांनी आठ वर्षांपूर्वी अर्धा एकर जागेत शेडनेट हाऊस केले होते. त्यावेळी १० लाख रुपये खर्च आला होता.

सदर शेडनेटमधे मिरचीचे ५४०० रोपांची लागवड केली होती.प्रत्येक झाडाला साधारणपणे २ ते ३ किलो मिरची आली होती.पीक ऐन जोमात असताना चक्रीवादळाचा तडाखा बसून मिरची चे संपुर्ण पीक जमीनदोस्त झाले आहे. 

मिरची चे १० लाख रुपयांचे नुकसान झाले आहे.तरी शासनाने नुकसान भरपाई देऊन मदत करावी अशी मागणी उध्दव राजाराम विधाते यांनी केली.

परिसरातील शेतकरी  दत्तात्रय विधाते, उध्दव विधाते,राजाराम विधाते, नितीन विधाते यांचे शेडनेट पॉलिहाऊस चे नुकसान झाले.फळबाग शेतकरी अतुल खिळदकर ,संतोष विधाते यांचे डाळिंब पिकाचे नुकसान झाले. लीलाताई खिळदकर यांचे राहते घराचे संपूर्ण पत्रे उडून गेले. सिताराम विधाते यांचे घराची भिंत कोसळून त्यांच्या मुलाचे पायाचे हाड फ्रॅक्चर झाले तो सध्या रुग्णालयात उपचार घेत आहे.

नांदूर येथे चक्रीवादळाने झालेल्या नुकसानीची पाहणी आष्टी तालुका कृषी अधिकारी गोरक्ष तरटे, कृषी पर्यवेक्षक लाळगे, कार्यालयीन अधीक्षक घनश्याम सोनवणे ,कृषी सहाय्यक खराडे मॅडम, मंडळ कृषी अधिकारी कांबळे आदींनी पिकांची पाहणी करून पंचनामे केले.