नांदूर विठ्ठलाचे येथे आषाढी एकादशीला कपारीच्या विठोबाची यात्रा

 

श्री क्षेत्र नांदूर,कपारीच्या विठोबाचे मंदिर, इन्सॅट मध्ये स्वयंभू मूर्तीचा तांदळा...( छाया : सोहेल मनियार चिचोंडी पाटील )

चिचोंडी पाटील ( प्रतिनिधी ) : सोहेल मनियार  आषाढ महिना लागला की अवघ्या महाराष्ट्राला वेध लागतात विठुरायाच्या वारी व दर्शनाचे. प्रति पंढरी किंवा धाकटी पंढरी म्हणून ओळखल्या जाणाऱ्या श्री क्षेत्र नांदूर विठ्ठलाचे येथे आषाढी एकादशी निमित्त रविवार दि.१०-७-२०२२ रोजी भव्य अशी यात्रा भरत आहे. ज्यांना पंढरपूरला जाता येत नाही ते भाविक भक्त एक दिवसाची का होईना पायीवारी व दिंडी घेऊन विठ्ठल दर्शनासाठी येथे येतात. 

श्री क्षेत्र नांदूर विठ्ठलाचे हे गाव अहमदनगर जामखेड रोडवर नगर पासून 30 कि.मी.अंतरावर व बीड जिल्ह्याच्या सरहद्दीवर हायवे पासून दोन कि.मी.आत मध्ये व कडा धानोरा पासून वीस कि.मी.असून गर्भगिरी पर्वत रांगेत निसर्गरम्य मेहेकरी नदीकाठी वसलेले आहे. 

टेकडी मधील काळ्या पाषाणात,कपारीत भक्तांच्या इच्छे खातर प्रकट झालेले पंढरीचे पांडुरंग स्वयंभू रूपात आहेत म्हणूनच कपारीचा विठोबा म्हणून ख्याती आहे.त्यांच्या दर्शनासाठी आषाढी एकादशीला लाखो भाविक भक्त येथे येतात.लाखो विठ्ठल भक्त हातात टाळ,मृदंग,भगवा पताका घेऊन कोणी पायी तर कोणी वाहनाने दिंड्या घेऊन येतात. विठ्ठलाच्या चरणावर नतमस्तक होऊन डोळे भरून विठ्ठलाला पाहून दर्शन घेऊन तृप्त होतात.

       महाराष्ट्र शासन तीर्थक्षेत्र विकास आराखड्यात क वर्गात या देवस्थानाचा समावेश झालेला असून विठ्ठल मंदिर ट्रस्ट तर्फे विविध विकास कामे चालू आहेत.

कोरोनासाथी मुळे दोन वर्ष यात्रा बंद होती त्यामुळे यावर्षी मोठ्या प्रमाणात भाविक येण्याची शक्यता गृहीत धरून नांदूर ग्रामस्थ व विठ्ठल मंदिर ट्रस्ट यांच्यामार्फत आषाढी साठी येणाऱ्या भाविकांना मोफत फराळ, पिण्याचे पाणी, दर्शन रांगा,वाहनतळ, दुकानांसाठी जागा,दर्शन वारीची व्यवस्था, येणाऱ्या दिंड्यांचे स्वागत, भजन व्यवस्था करण्यात आलेली आहे. यात्रेनिमित्त येणारे प्रसादविक्रेते, खेळणेवाले,फुलहार वाले व पाळणावाले यांच्यासाठी उपलब्ध जागेनुसार सोय केलेली आहे.

 

विठ्ठल मंदिर ट्रस्टने कोरोना काळात गावातील महादेव मंदिरास कळस (शिखर) व विठ्ठल मंदिरा जवळ प्रशस्त पाकशाळा बांधलेली आहे. महादेव मंदिरास गावातील ह.भ.प.भागुजी विधाते गुरुजी यांनी स्वखर्चाने रंगकाम केले आहे.तसेच तालुक्यातील ज्येष्ठ नेते देविदास आबा धस यांनी स्वखर्चाने संपूर्ण विठ्ठल मंदिरास दोन लाख रुपयाचे रंगकाम करून दिले आहे.तीर्थक्षेत्र विकास निधी अंतर्गत जिल्हा परिषद सदस्य वर्षा माळी यांच्या निधीतून भव्य भक्तनिवास उभारण्यात आले आहे.

नांदूर ग्रामपंचायत तर्फे मंदिरासमोर पेविंग ब्लॉक बसवण्यात आले आहेत. आष्टी पाटोदा मतदार संघाचे विद्यमान आमदार आजबे काका यांच्या निधीतून तीन लक्ष रुपये किमतीचे जुन्या भक्त निवासासमोर पेविंग ब्लॉक बसवले आहेत व ग्रामस्थांच्या वतीने शिखर रंगकाम केले असून भविष्यात शुभकार्यासाठी,सप्ताह,किर्तन तसेच धार्मिक विधीसाठी ६०बाय ५०फुटाचे पत्र्याचे शेड,सभा मंडप उभारण्याचा संकल्प आहे असे विठ्ठल मंदिर ट्रस्टचे अध्यक्ष एकनाथ बलभीम विधाते व विठ्ठल मंदिर ट्रस्ट विश्वस्त यांनी सांगितले असून या मंदिर कामासाठी भाविकांना देणगी देण्याचे आवाहन केले आहे.

नांदूर ग्रामस्थ व विठ्ठल मंदिर ट्रस्ट यांनी यात्रेची पूर्ण तयारी, नियोजन केले असून,अंभोरा पोलीस स्टेशनचे पोलीस उपनिरीक्षक व त्यांच्या कर्मचाऱ्यांनी चोख बंदोबस्त ठेवलेला आहे.